La lhéngua mirandesa ne l Festibal Antercéltico 2006

L Festibal Antercéltico 2006 ten un porgrama dedicado a la lhéngua mirandesa. Desse porgrama fázen parte dues einiciatibas:

La Carreira de la lhéngua
Oufecina de lhéngua mirandesa

La Carreira de lhéngua – Sábado, die 5 de Agosto de las 16 – 18 horas
La Carreira de la lhéngua bai a ser un passeio que bamos a dar pulas rues, cafés i outros sítios de la bila de Sendin adonde haba giente, cul oujetibo de dibulgar la lhéngua mirandesa a las pessonas que mos bejítan I de ancentibar ls próprios mirandeses a falar la sue lhéngua.
Bai a ser assi: un grupo de pessonas bai a correr ls cafés i algues rues de Sendin, cun gaiteiros alantre a anunciar i a abrir camino, dezindo poemas, lhonas i cuontas an mirandés, saludando las pessonas an mirandés i cumbidando-las a partecipar na Oufecina de lhéngua mirandesa..
Quien bai nesse grupo de pessonas? Bai quien quejir partecipar nesta dibulgaçon de la lhéngua mirandesa. Queda eiqui todo mundo cumbidado.
L ancuontro de purparaçon para esta jornada ye al amuorço de Sábado, na Taberna de ls Celtas a las 13 horas. Mas quien nun pudir star puode alhá a aparecer até un cachico antes de la hora d'ampeço, a las 16 horas.
La Carreira de la lhéngua ampeça a las 16 horas na Taberna de ls Celtas i acaba a las 18 horas na Junta de Fraguesie de Sendin, i bai por este camino:

Taberna de ls Celtas > Bumbeiros > Café Sendinés > Café Encontro > Café Fuonte Nuoba > Canzielho > Rue de Santo Cristo > Sagrado > Camino Prado > Junta de Fraguesie.

Oufecina de lhéngua mirandesa – Sábado, die 5 de Agosto, de las 18 – 19h30 – Salon Nobre de la Junta de Fraguesie.
De las 18 a las 19 h 30 bamos a cuntinar a falar mirandés, mas agora bamos subretodo a falar de la lhéngua mirandesa:

daprender a dezir alguas cousas an mirandés;
splicar que lhéngua ye esta, de adonde i de quando ben, i adonde se fala;
an que situaçon stá la lhéngua i adonde las pessonas puoden sacar mais anformaçon subre eilha.

A todos ls partecipantes seran çtribuídos testos subre la lhéngua mirandesa i an lhéngua mirandesa. Esta oufecina nun ye solo para giente de fuora, mas quien quejir partecipar.

Alhá bos spero, para ua grande jornada cultural al redror de la nuossa lhéngua.

Amadeu Ferreira